.
.
.
.
ابتسامات
بعد فرحى بأسبوع اكتشفت ان مراتي علي اتصال بالعالم اللى تحت الأرض وكانت مخبيه عني والا مكنتش هتجوزها
انا سبتها في الاوضه وخرجت اجيب كوبايه ميه ، جبتها ورجعت ولسه مدخلتش من باب الاوضه سمعتها بتقول
برايمر .... كونسيلر .... كونتور ..... هايلايتر .
وياريتها علي قد الاربعه دول دا طلع فيه " برونزر "
كوباية الميه وقعت من ايدي
ياحزنك الاسود ياوليد ودي الواحد يتعامل معاها ازاي هو انا ناقص المهم خبطت ع الباب عشان لو هما موجودين تصرفهم ولا اشوفهم ولا يشوفوني وبالفعل دخلت ملقتش حاجه الحمدلله
قعدت علي حرف السرير زي اللي خايف من امه لتقول لابوه انه شرب سجاير وقريت كل القرآن اللي أنا حافظه وخلصته ودخلت علي التواشيح والاناشيد الاسلامية ماهو العمر مش بعزقه ياجدعان
وبعد ما قربت من ربنا ونسيتها خالص قالتلي
ياوليد انا ليه لما قولتلك نروح اسكندريه اسبوع قولتلي مبتحبش البحر ؟
قولتلها ايه دا لا استني بقي عندك وبكل غضب وعصبية كأنها شتمتني بأمى
مين قالك مش هنروح انا بحب البحر
بصتلي باستغراب
ايوا بحبه انا مولود في العوامه لا طبعا نروح انا مسمحلكيش تجيبي سيرة البحر قدامي انا بحبه اكتر من عم زكريا البواب
طبعا دا اي كلام في اي كلام انا بخاف اغرق وانا في البانيو
بس ازاي ارفضلها طلب اقسم بالله ياجماعه قالت التعويذه كامله من اول البرايمر مرورا بالكونسيلر وصولا للهايلايتر
المهم امي لاحظت اني بسمع كلامها عمال علي بطال من قبل ما تتكلمه ولما ضيقت عليا في السؤال حكيتلها
قالت لا يابني متظلمش يمكن دي حاجات بنات من بتاعة اليومين دول ، قولي تاني كدا هي قالت ايه
قالت برايمر و كونسيلر و هايلايتر و برونزر
بصتلي بخوف كدا وقالتلي هي قالت برونزر ؟؟
ايوه ياما قالت
لا البت دي ملبوسه
طيب ياما اقولها انك قولتي كدا
وشها قلب ألوان
يخربيتك وبيت شكلك وانا مالي اوعي تجبلها سيرتي انا ناقصه تقلب عليا
استغليت الفرصه
بقولك هاتي عشر تلاف عشان هي دماغها والسفر
خد يااخويا بس قولها ان انا اللي مدياك الفلوس واني بحبها واي حبشتكنات كدا عشان متزعلش مني واول ماترجعوا من السفر هجيبلها الشيخ
ولما رجعنا من السفر قعدت انا وامي مع شيخ من بلدنا كدا واحنا بناكل لقمه مع بعض حكينا الموضوع
الشيخ قلع الطاقيه وهرش في راسه وقال لا الاسماء تقيله ماليش صرفه معاهم
ياعم يهديك يرضيك قال طب هقعد معاها اقولها اللي انتوا قولتوه واشوف يمكن انتوا ظلمه اصل الاسماء دي عشيره بحالها
وانت عرفت منين ياشيخ انهم عشيره
قال اصل اسمائهم غريبه واول مره اسمعهم
ندهت عليها بكل أدب الازواج مش خوف منها لا دا حب
ياحبيبتي ياللي ليا... بعد كل الكون ما باعني
دخلت وسلمت وقعدت
الشيخ بعد ما قرأ ايه الكرسي بصوت واطي يدوب أنا سمعته قالها
يابنتي انتي تعرفي الكونتور
اه ياعمو
يانهار اسود ومنيل
طيب يابنتي بالله عليكي تركزي
تعرفي الكونسولر
اه ياعمو الكونسيلر اعرفه دول عندي جوا
انا سمعت دول عندي جوا من هنا وقومت ادور علي شبشبي عشان اروح الجامع اشوف لو فيه اي صلاه فاتتني
راح الشيخ ماسك ايدي وقايلي تلاته بالله العظيم مانت قايم
قعدت ولله الامر
الشيخ قال يابنتي دول بيستخدموكي من امتي
قالت دا انا اللي بستخدمهم مش هما اللي بيستخدموني
الشيخ سمع انها اللي بتستخدمهم من هنا وقام يدور علي شبشبه تقريبا هيدور لو كان فيه اي صلاه فاتته برضو ولا حاجه
مسكته وقولتله تلاته بالله العظيم من انت قايم
و اول ما قالت وعندى قدهم اربع مرات هروح اجيبهم
قومنا جري انا وهو نخبط في بعض ويدوب لحقنا ناخد حاجه نلبسها في رجلنا لما طلعنا بره لقيت الشيخ معاه هاف بوط
جيت أضحك معرفتش لاني كان معايا جزمة امي
المهم فضلنا برا بتاع ربع ساعه وامي جوا لوحدها و مستنيين اول صرخة لامي ومتفقين نكسر الباب عليهم ونقول في صوت واحد
" آية الكرسي "
ونحرقهم زى ما عزت العلايلي حرق عادل امام في الانس والجن
المهم عدي بتاع نص ساعه ومفيش نفس ليهم
الشيخ اتنهد كدا وقال الحمدلله تلاقي الاتنين ماتوا وخلصنا من شرهم
قولتله انت بتقول ايه ياعم انت استني ندخل نشوف فيه ايه بالهاف بوط اللي انت لابسه ده
المهم دخلت من غير ما اعمل صوت والشيخ ورايا
لقيت امي بسم الله ما شاء الله وشها صغر عشر سنين وبقت زي القمر انا فكرت ان دا جن من بتوع مراتي لبسها خلاها شباب بس اكتشفت الحقيقة لما امي قربت مني بكل حنية الامهات
وراحت رزعاني بالقلم وقالتلي
هات العشر تلاف اللي انت خدتهم تسافر بيهم انا عاوزه اجيب كل الانواع البرايمر والكونسيلر والكونتور وكله كله
ياما انتي اتلبستي ياما
قالت دول ادوات مكياج ياجاهل ما انت طالع لابوك كان بيمسك قلم الكحل يصحح بيه للعيال في المدرسة
منقووول
0 تعليقات